|
Galicia ten por diante un reto complexo pero apaixonante que a Xunta de Galicia se propón liderar coa mirada posta nos sectores máis vulnerables.
Atravesamos un momento de extraordinarias dificultades, sobre todo no ámbito económico, e a ninguén se lle escapa que os traballadores autónomos están entre os que máis sofren as consecuencias do contexto actual, polo que aliviar a súa situación debe ser a prioridade de calquera Goberno, sexa cal sexa o seu ámbito de actuación.
A pesar das limitacións que impón o contexto económico actual, son varias as necesidades do sector ás que hai que dar resposta. Loitar contra a morosidade, aprobar rebaixas selectivas no ámbito fiscal, axilizar os cobramentos pendentes das administracións, reforzar os niveis mínimos de seguridade ou dar facilidades administrativas ao sector son algunhas das que non poden esperar.
Por iso, propóñome iniciar unha política de portas abertas para canalizar o contacto estable e permanente cos autónomos galegos e, desta forma, coñecer as súas demandas e ter en conta as súas críticas e as súas propostas.
Maior aínda se cabe que o meu empeño en materializar estes obxectivos é a miña confianza no potencial dos 190.000 autónomos galegos. A historia é testemuña da capacidade de esforzo e do carácter emprendedor dos homes e mulleres de Galicia. Con estes cimentos, a nosa comunidade ten que dar a batalla. Todos os días e entre todos.
Alberto Núñez Feijóo
Presidente da Xunta de Galicia
|
Usuario - - Acceso de usuarios
