Os Autónomos poderán cambiala súa base de cotización dúas veces ao ano Os traballadores autónomos poderán efectuar ata dous cambios voluntarios na súa base de cotización ao ano en lugar dun como ata agora, dentro dos límites mínimo e máximo aplicables en cada exercicio, o que lles permitirá unha maior adecuación das cotizacións aos seus ingresos reais. Isto é o que precisa a Orde que entrou en vigor o pasado día 8 de decembro, pola que se modifíca a Orde do 24 de setembro de 1970, relativa ás normas para a aplicación e desenvolvemento do Réxime Especial dos Traballadores Autónomos (RETA). A redacción orixinal dispoñía que estes autónomos podían cambiar anualmente a base de cotización, elixindo outra dentro das establecidas, sempre e cando o solicitaran á Tesourería Xeral da Seguridade Social antes do 1 de outubro de cada ano e con efectos a 1 de xaneiro do ano seguinte. Segundo a revisión do texto, manterase esta opción cos mesmos prazos, á que se engadirá a posibilidade de efectuar unha nova mudanza na base de cotización, solicitándoo antes do 1 de abril e con efecto a partir do 1 de xullo seguinte. A nova disposición do Ministerio de Traballo e Asuntos Sociais sinala que a imposibilidade de tramitar cantas solicitudes de cambio se formulen fixo necesaria a limitación a unha modificación anual, e alude que "os actuais medios técnicos de que dispón a Administración da seguridade Social permiten flexibilizar esa regulación", permitindo unha modificación semestral por solicitante. Excepcións para os maiores de 50 anos Doutra banda, a mesma orde actualiza a redacción sobre os límites específicos de bases de cotización para os traballadores autónomos incluídos no RETA que teñan 50 ou máis anos de idade. Neste sentido, dispón que os traballadores nesta franxa de idade no momento de producir efecto ou cambio voluntario de base de cotización, só poderán elixir unha base que estea comprendida entre os límites establecidos especificamente para eles en cada exercicio pola respectiva Lei de Presupostos Xerais do Estado e a Orde anual de cotización á Seguridade Social. Así mesmo, o texto indica que os autónomos que coticen polas bases máximas poderán solicitar que, mentres manteñan a súa situación de alta no devandito réxime, a súa base de cotización se increménte automaticamente na mesma porcentaxe en que se aumenten devanditas bases máximas.
|