A XUNTA DÁ LUZ VERDE AO DECRETO QUE CREA O CONSELLO GALEGO DA REPRESENTATIVIDADE DAS ASOCIACIÓNS DE AUTÓNOMOS
Trátase do paso previo á constitución do Consello galego do traballo autónomo
Este órgano ocuparase de determinar a representatividade das asociacións profesionais de traballadores autónomos, a través dunha serie de criterios obxectivos fixados no decreto
O Consello da Xunta deu hoxe luz verde ao proxecto de decreto que crea o Consello galego da representatividade das asociacións profesionais de traballadores autónomos de Galicia. A súa constitución é o paso previo de cara á creación do Consello galego do traballo autónomo, que será o órgano consultivo do Goberno galego en todas as materias que afecten este colectivo.
O proxecto de decreto que se aproba hoxe permitirá poñer en marcha o Consello galego da representatividade, que se constituirá como un órgano colexiado adscrito á Consellería de Traballo e Benestar.
A súa principal función será a de valorar e declarar a representatividade das distintas asociacións profesionais de traballadores autónomos de Galicia, seguindo uns criterios obxectivos que se inclúen no decreto.
Entre estes criterios obxectivos de valoración, cabe destacar o número de traballadores autónomos afiliados; as sedes permanentes das asociacións; o número de asociacións coas que estas entidades asinen convenios; os recursos humanos e materiais; as actividades no últimos tres anos; e os orzamentos dos últimos tres exercicios.
Hai que ter en conta que esta actuación inscríbese na importante aposta do Goberno galego pola promoción do emprendemento e polo apoio aos autónomos galegos. Cabe destacar, por exemplo, que a Xunta está a traballar actualmente no Plan de Emprego Autónomo e Emprendedor, que constituirá o primeiro plan dun goberno galego destinado especificamente a este colectivo. Na actualidade, esta iniciativa está a ser
analizada para a súa aprobación na Mesa do Autónomo –impulsada tamén por este Goberno-, así como no seo do diálogo social.
O plan definirá medidas para o apoio aos traballadores e traballadoras autónomas en tres fases fundamentais: a toma de decisión emprendedora e a súa materialización efectiva; o apoio ao inicio da actividade e o asesoramento técnico, xerencial e financeiro na consolidación e crecemento empresarial.
Ademais, creouse o Rexistro galego de asociacións profesionais de traballadores autónomos e promovéronse as distintas liñas de axudas a este colectivo, entre as que destacan as subvencións para o establecemento como traballador por conta propia; axudas para formación ou asistencias técnicas; así como subvencións para a primeira contratación indefinida, entre outras.
|