PORTELO ELECTRONICO PARA O REXISTRO DE AUTONOMOS ECONOMICAMENTE DEPENDENTES

O INEM abre un portelo electrónico para o rexistro dos autónomos económicamente dependentes

O Servizo Público de Emprego Estatal (SPEE, antigo INEM) puxo en marcha o pasado mes de abril un portelo electrónico para o rexistro dos contratos dos Traballadores Autónomos Economicamente Dependentes (TAED) que servirá como alternativa ao rexistro presencial nas Oficinas de Prestacións do SPEE, en funcionamento desde o pasado mes de febreiro.

Durante a presentación da nova ferramenta informática, á que se pode acceder desde o 2 de abril, o director xeral de Economía Social, Traballo Autónomo e Fondo Social Europeo, Juan José Barrera explicou que os contratos que os TAED asinen a partir de agora deberán rexistrarse "de forma obrigatoria" a través de calquera destes dous sistemas.

Mentres, os rubricados con anterioridade dispoñerán dun período transitorio ata a aprobación do regulamento que rixe o seu funcionamento.

A partir dese momento, os traballadores que aínda non rexistren o seu contrato terán un prazo de seis meses para solicitar o seu rexistro aos empresarios ou clientes aos que presten os seus servizos. Pola súa banda, estes dispoñerán dun máximo dun ano para aceptar estas novas condicións.

Neste sentido, Barrera explicou que só os sectores de transportes e seguros, os "máis importantes", contarán cun prazo de 18 meses para proceder ao rexistro.

Tanto a alternativa presencial como a electrónica permiten que o rexistro sexa realizado polo traballador, polo empresario ou por un representante.

Sen embargo, á hora de utilizar a versión 'online', os usuarios terán que dispoñer de sinatura electrónica e, no caso de que sexa o representante o que faga o trámite, unha autorización previa do empregado.

Respecto aos rexistros realizados ata o momento, o director xeral explicou que aínda non dispoñen de datos de inscrición a través de esta alternativa electrónica porque "algunhas comunidades autónomas estiveron rexistrando contratos pola súa conta ata este momento" e aínda teñen que facilitar as súas propias cifras.

Non obstante, calculou que "en torno a 300.000 traballadores", é dicir, arredor do 10% do total de autónomos, poderían estar rexistrados unha vez se aprobe o regulamento.

Por sectores, Barreira sinalou que os axentes de seguros de exclusividade e os transportistas serán os de maior presenza neste novo rexistro.

Preguntado polo calendario para a aprobación do regulamento que regulará a contratación dos TAED, Barreira comentou que "en breve" trasladarase un segundo borrador ás organizacións de autónomos e ao resto de axentes sociais.

Tralas súas observacións, o Ministerio de Traballo elaborará un documento definitivo, un trámite que, segundo o Director Xeral, podería durar de 25 a 30 días.

O seguinte paso será o trasladalo ao Consello de Estado, onde, segundo estimou, podería permanecer entre un mes e medio e dous meses. "Antes de irnos de vacacións queremos telo aprobado", engadiu.

Así mesmo, Barrera sinalou que o novo texto regulará, ademáis deste sistema de inscrición, a elaboración dos propios contratos do colectivo e a creación dun rexistro de asociacións de autónomos.