Instituto Galego de Consumo

Xunta Arbitral de Consumo

Tal como informamos en Boletíns anteriores, a Federación de Autónomos de Galicia colabora co Instituto Galego de Consumo participando nas Xuntas Arbitrais de Consumo con catro árbitros.

Posto que a arbitraxe é un medio rápido, eficaz e moi económico para solucionar os conflitos entre empresarios e consumidores, animamos a tódolos profesionais a se sumar ó sistema de arbitraxe por ser o medio máis útil de solucionar conflictos cos clientes.

Igualmente debemos poñer de manifesto que existen numerosas entidades que, se ben non formalizaron o seu compromiso de adhesión á arbitraxe, resolven os seus litixios cos consumidores a través da vía arbitral para o caso concreto presentado.

O laudo arbitral é a decisión do Colexio Arbitral designado ó efecto para a resolución do litixio, que ten a mesma eficacia xurídica que unha sentencia xudicial.

A Lei de Arbitraxe e o Regulamento do Sistema Arbitral de Consumo establecen a opción entre a arbitraxe en dereito e en equidade, é dicir, segundo o leal saber e entender dos árbitros que compoñen o Colexio Arbitral.

A Xunta Arbitral de Consumo é un organismo vinculado á Xunta de Galicia, a través do Instituto Galego de Consumo, coa colaboración de asociacións de empresarios e consumidores, que ten como obxectivo resolver, a través dunha arbitraxe, de maneira voluntaria, rápida e gratuíta, os desacordos que poidan xurdir entre as consumidores/usuarios e os empresarios.