|
A equiparación do Réxime Especial da Seguridade Social dos Traballadores Autónomos co Réxime Xeral, en materia de prestacións, é unha demanda unánime e urxentísima. Estas son algunhas das nosas propostas: 1. Dereito de percibi-lo seguro de desemprego para tódolos Autónomos no caso de peche da empresa, establecendo un sistema de cotizacións similar ó dos traballadores por conta allea. 2 Extensión do seguro de desemprego a cónxuxes, ascendentes e descendentes ata o 2º grao, que establezan contratos de traballo co Autónomo e paguen as cotas correspondentes. 3. Extensión das bonificacións nas cotas da Seguridade Social ós contratos de traballo celebrados por un Autónomo co seu cónxuxe ou parente ata o 2º grao. 4. Xubilación anticipada a partir dos 60 anos, nas mesmas condicións establecidas para os traballadores do Réxime Xeral. Neste punto, a última reforma (Lei 47/98, de 23 de decembro, B.O.E. do 29/12/98), vén empeora?la situación anterior ó esixir a aqueles que, sendo Autónomos na actualidade, desexen acceder á xubilación anticipada, que acrediten que unha cuarta parte das cotizacións efectuadas ó longo da súa vida laboral fosen a un réxime que contemple o beneficio da xubilación anticipada. Ata agora abondaba con cotizar un só día a algún deses réximes.
O Réxime de Autónomos non contempla a xubilación anticipada. 5. Consideración da prestación de Incapacidade Temporal como rendemento do traballo, a efectos da declaración do Imposto sobre a Renda das Persoas Físicas, posto que desta forma tería un tratamento fiscal máis favorable que na súa actual consideración de rendemento empresarial. A prestación de incapacidade temporal que percibe un traballador por conta allea considérase rendemento de traballo e xera o correspondente dereito á deducción prevista por tal concepto. 6. As baixas presentadas fóra do prazo non teñen efectos en materia de prestacións, se ben deben ser ingresadas as cotizacións cos seus correspondentes recargas e sanción correspondente. Solicitamos que a partir do segundo recibo impagado, a Seguridade Social aplique de maneira automática a baixa, absténdose de pasar ó cobro novos recibos, sen prexuízo de que, se a falta de pagamento se debe a motivos distintos ó cese de actividade, o titular poida demostralo e pagar eses recibos fóra de prazo, coas recargas e sancións aplicables. 7. Acceso progresivo ó Réxime de Autónomos para todas aquelas persoas que inician unha actividade, como medida de fomento do emprego: o primeiro ano, exento de cotización; o segundo ano, 30% da Base mínima; o terceiro ano, 60% da base mínima; o cuarto ano, 100% da base mínima.
Posibilidade para tódolos Autónomos de se acoller á COTIZACIÓN A TEMPO PARCIAL, en función das horas realmente traballadas na actividade da que se trate, axustando o seu recibo de Autónomos e, polo tanto, a súa cotización á Seguridade Social ás horas realmente traballadas, igual que ocorre cos traballadores do Réxime Xeral. 8. No Réxime de Autónomos non colle o incremento do 20% da Base Reguladora pola incapacidade permanente total cualificada cando o traballador é maior de 55 anos. Solicitámo?la equiparación co Réxime Xeral neste punto (Aprobado recentemente). 9. Un Autónomo con 65 anos e 15 de cotización percibe unha pensión inferior ó Salario Mínimo Interprofesional. Solicitamos unha modificación no senso de que a pensión mínima no Réxime de Autónomos se equipare ó salario mínimo interprofesional.
|
Usuario - - Acceso de usuarios
